De Harvst hett uns faat. De Daag warrn kötter un dat Weder warrt nu ok immer gräsiger. Dor is dat veel beter, wenn wi an'n Sünndag, den 23. Oktober 2016, Klock 10 in de Marienkark in Beuken-Dörp tosamen kümmt un een plattdüütschen Goddesdeenst fiert.
Dor is Warmde un Licht, dor kümmt Lüüd tosamen, de fründlich sünd, de ok gern mal singen wüllt, de Gott sien Wöör höörn wüllt un de sik achteran na den Goddesdeenst bi een Tass Koffee noch'n beten wat vertellen wüllt. Hest Lust? - Denn kümm vörbi! - De Küll un den Regen laat wi buten! - Vun Harten willkommen is jedeen, de dorbi sien will!